ONGWEDIVA- Opolifi moshitukulwa shaShana otai konakona oshibofa kombinga shotuwa yomupolifi vati ya umbwa nondjebo kuwalye ndele oholo tai hake mekende lotuwa.
Oshiningwanima osha ningwa oshivike sha dja ko mOngwediva efimbo lokomatango pofitola yo Spar.
Omukulunhu wopolifi mo s h i tukulwa sha Shana , Commissioner Andreas Shilelo okwa koleka onghundana e i pefimbo a ninga eenghundafana naKundana. Okwa hokolola ta ti omupolifi okwa li e li motuwa nomukulukadi waye osho yo okaana kaye ve li meni omutumba komesho yofitola ei.
Otaku hokololwa kutya ova uda ashike eshi oholo yondjebo ye li denga mekende lotuwa yavo. “Elao linene ka pena omunhu a monifwa oshiponga shaashi oholo oya haka mekende,” ta ti.
Shilelo okwa ti fiyo opapa ka pena ouyelele kutya ondjebo oya umbwa kulyelye, onghee opolifi oye li pyakidila nokuninga omakonakono omoule.
Okwa pula moshiwana kwau ena ouyelele kombinga yomunhu aumba ondjebo ei opo shilopotele opolifi keshe i li popepi. “Omunhu taka yandja ouyelele kwa a menwa kopolifi. Edina laye ita li tumbulwa noukwatya waye,” ta ti.
Okwa ti osha fimana ngeenge oshiwana tashi longele kumwe nopolifi okuyandja ouyelele molwaashi eshi otashi kwafele opolifi i kale ya katuka onghatu osho yo okuninga omakonakono noupu.
Shilelo okwa yelifa ta ti omunhu keshe ou auda omutopelo wondjebo efiku tuu olo okwa manguluka opo aka yandje ouyelele kombinga.
Okwa ti oshiningwanima eshi ota li limbilike shaashi opolifi otai li pula kutya elalakano ola shike lomunhu ou eshi aumba otuwa yomupolifi.
“Opolifi otai kwashipaleke okukaleka po eameno lovanambelewa wopolifi molwaashi navo ove na ovatondi va hala okuvalongela oushada,” ta ti.
-fhamalwa@nepc.com.na
The post Otuwa yomupolifi ya umbwa nondjebo kuwalye appeared first on New Era.