GHADC-ni term-ko ra·dodaptaina nangani gimin CM talata

Date:

Share post:

SHILLONG: Garo Hills Autonomous District Council (GHADC)-ni term ba somoiko da·o changsataie jadokna ra·dodaptaiahani gimin aro election-ko ong·atgija donchipengani gimin dingtang dingtang dolrangni matnanganirangko man·engon, GHADC-o constituency-rangni simarangko gital dake salpiltaiani aro GHADC-na dingtang electoral roll-ko tariani kamrang matchotkujaengani giminsa GHADC-ni term-ko jadokna ra·dodaptaina nangaha ine Mongolbar salo, a·dokni Chief Minister Conrad K Sangma talataniko on·angaha.
“GHADC election-ko ong·atgija donchipna chingo maming miksonganirang dongja aro chinga batanggimin change jadokna ra·dodapatgipa somoi matchota bakan election-ko ong·atna miksonganiba dongachim,” ine Sangma, kobor ra·timgiparangna aganaha.
GHADC-ni constituency-rangko gital dake sualpiltaiani kamrang aro dingtang electoral roll-ko tariani kamrang matchotkujaengani giminsa sorkari, GHADC-ni term-ko jadokna ra·dodapattaina nangaha ineba Chief Minister aganaha.
“Constituency-rangni simarangko salpiltaiani kamrang matchotkujaskalde election-ko ong·atna man·jawa aro dingtang electoral roll-ko taria matchotkujaskalde, constituency-rangni simarangko salpiltaiani kamrangba matchotna man·kujawa,” ine Sangma aganaha.
Constituency-rangko gital dake salpiltaiani gimin janapatengon, constituency-rangni simarangko salpiltaianio, dingtang electoral roll-ko tarina Governor-ni ra·chakaniko nangchengaha aro uni ja·mansa bon·kamgipa kamrangko ka·na man·aha ine Chief Minister parakataha.
Da·o GHADC-na dingtang electoral roll-ko tarina kamrangko a·bachengahani gimin jadokni gisepon kamrangko matchotatna sorkari ka·dongenga ineba ua aganaha.
“Chinga election-ko ong·atninggija donna miksonganirang dongja aro man·a dipetde election-ko ta·raken ong·atna miksonganirang dongachim,” ine Sangma aganaha.
March jao GHADC-ni term-ko jadokna ra·dodapatani da·o October 17 tarikon bon·engahani gimin GHADC-ni term-ko ra·dodapgija, joljol election-ko ong·atchina Garo Hills-ni dingtang dingtang dolrang dabitokengachim ine nikna man·a.|
Indake ong·genchimoba, da·o changsataie GHADC-ni term-ko jadokna ra·dodapatahani gimin GHADC election-ko re·baenggipa 2027 bilsini April 17 tarik ja·mansa ong·atna man·gnok ine nikna man·a.