OUTAPI- Opolifi moshitukulwa shaMusati oya unganeka efiku lomifyuululwakalo omo kwa li va djala va fewa nelalakano lokukaleka po efimano lomifyuululwakalo neenghulunghedi.
Oshindingili eshi osha li ko Etitatu modoolopa yaUtapi.
Ovapolifi va dja koitaasi ya yooloka moshitukulwa okwa li va hooloka momwaalu muhapu okudimbuluka efiku lavo.
Omupopiliko wopolifi moshitukulwa shaMusati Senior Inspector Anna Kunga okwa ti efiku oha li dimbulukiwa omudo keshe okukaleka po efimano lomifyuulwakalo kovambelewa vopolifi osho yo okuulika efano liwa moshiwana.
Okwa yelifa ta ti ovapolifi okwa li ve udite etumba va fewa eshi va djala midjalo davo dopamifyuululwakalo okudja komihoko da yooloka.
“Otashi ulike oukumwe nolongelokumwe ngeenge ovapolifi va hangana pamwe navakwao. Oukumwe owa fimana koilonga efimbo keshe shaashi otau xwaxwameke ombili,” ta ti.
Kunga okwa ti kefiku e li okwa li kuna ovapolifi va djala omidjalo tadi ulike ehongo nghene oikuna yopamifyuululwakalo hai djalwa osho yo hai hondjwa.
“Okwa li tava imbi nokudana oidano yoshiwana. Ehafo linene ola li kovapolifi. Okwa li tava ulike oinyangadalwa ya yooloka yopamifyuululwakalo,” ta ti.
Okwa ti ovapolifi kave shi ashike ovanhu hava djala omidjalo doilonga ile okukwata po ovanhu ndele navo ohava dulu okuulika oupenda wavo ngeenge va djala omidjalo dopamifyuululwakalo.
Kunga okwa kumaida oshiwana opo shi twikile okukala shina ekwatafano liwa nopolifi nokulongela kumwe.
The post Opolifi otai kaleke po omifyuululwakalo appeared first on New Era.