Joseph Kamata
Nompitisili domoKavango zoupumezuva kavahundilire asi nkenye eyi tuna kurugana twahepa kuhameseramo vantu vana kuparuka nourema merongo ntani mekuliko nkenye, omu nye vana kuhundira nkarapamwe vahageke kuvaninkiliramo makura twahepa kutulisapo nompito danavenye.
Ehundiro lyangesi kavalirugene pepongo eli kava kere nalyo wombunga zoNational Disability Council of Namibia, zovahamenimo navenye vana kugava edeuro moRundu.
Mosihuyungwa sosinene Nguuru gomukunda Kavango zoupumezuva Hamunyera Hambyuka, mbudi ezi kageve mukurona godoropa zaRundu, Andreas Yikerwa, nguuru katente asi eyi yokupira kuvahameseramo vantu vana kuparuka nourema yahepa kukara sinka setu natuvenye mokuvareta momalikwamo turuganesa nonkondo detu pamberewa nokuvatera natuvnye tukare nositambo simwe tupu. Nguuru kayitambwire asi vantu vatunga nourema, unene vakara nye konomukunda doponze, kuna kumona kanyando mokugwana erongo, uhaku, yirugana yemepangero, ntani nombudi nkenye dohepero. Age kahundilire nye vahamenimo navenye vahameseremo vantu vana kuparuka nourema mwankenye malikwamo vana kara nago gekuliko.
‘’ Nga nguuru, ame kuna kuhundira navenye twakara moKavango zoupumezuva asi twahepa kuturamo vantu vana kuparuka nourema mwankenye ekuliko lina kumoneka momukunda,’’ yimo ana kutanta Hambyuka.
‘’ Malikwamo getu gahepa kukara asi kuna kumoneka omu navagwana nombudi kuhamena ekuliko, muna hamene nosure, kugwana yirugana kukwama nongendeseso ntani monkarapamwe omu navavazigida kwankenye epongo nawo valihameseremo, vakare nawo kuna kulizuvha uwaawa, yimo ana kugwedako.
Mukurona godoropa ogu kakere asi yige ana kugava mbudi zetambwiromo, nage katumbwire asi vantu vana kuparuka nourema twahepa kuvatura momalikwamo gonkarapamwe, omu navakara asi nawo kuna kuvapurako vagave magano gawo ntani nsene kuna kutura matokoro kuhamena kwawo nawo valihameseremo mokutura matokoro.
NDCN mberewa zonene asi gava kuhamena noveta ntani gumwe nye ana kugendesa projeka ezi, Jessica !Gawachab, katente asi vantu vana kuparuka nourema, unene vana kara konomukunda dooiponze, awo kuna kumona kanyando kuhamena ugendero, opo nye vana kuwiza kodoropa vayapapare mbatero nkenye unene ngwendi erongo, uhaku, ntani mbatero konosasiyona dovaporosi.
Nampili ngoso, age kavahundilire vakara nomukumo nokuvatantera asi ndango zawo nazivavatera tupu vagwana mauwa aga naga vagusa momaudigu gangesi.
!Gawachab, simpe kahundilire nkarapamwe asi vahaninkiliramo vantu ava vana kuparuka nourema, nye vahepa kutwikira ngooro mokuvavatera.
*Joseph Kamata mugavi nombudi koministeli zomapukururo nounkurungu, moKavango zoupumezuva.
The post Nompitisili kuna kuhundira tuhameseremo vantu vana kuparuka nourema appeared first on New Era.