Մոսկվան համաձայնել է վերականգնել Ռուսաստան-Ուկրաինա-ԱՄՆ եռակողմ ձևաչափով հանդիպումները, այս մասին հայտնել է Ռուսաստանի նախագահի օգնական Յուրի Ուշակովը՝ Սանկտ Պետերբուրգում նախագահ Վլադիմիր Պուտինի և ԱՄՆ նախագահի հատուկ բանագնաց Սթիվ Ուիթքոֆի բանակցություններից հետո:
«Նախագահը Սթիվ Ուիթքոֆին տեղեկացրել է, որ մենք, սկզբունքորեն, պատրաստ ենք վերսկսել վերոնշյալ եռակողմ բանակցությունները հիմնական թեմայի շուրջ նոյեմբերի 10-ին։ Այս թեման վերաբերում է Ռուսաստանի և Ուկրաինայի համար անվտանգության համակարգի կառուցմանը հակամարտության ավարտից հետո», - լրագրողներին ասել է Ուշակովը։
Նրա խոսքով՝ Ուիթքոֆը հանդիպման ժամանակ աջակցել է առաջարկին՝ ասելով, որ «նման որոշումը, անկասկած, մեծ գոհունակությամբ կընդունվի նախագահ Թրամփի կողմից»։
Ուշակովն ասել է, որ հաջորդ հանդիպման վայրը կարող է լինել Աբու Դաբին, պատվիրակության կազմը դեռևս հաստատված չէ։ Ռուսաստանի, Ուկրաինայի և Միացյալ Նահանգների միջև եռակողմ բանակցություններ արդեն տեղի են ունեցել Արաբական Միացյալ Էմիրությունների մայրաքաղաքում 2026 թվականի հունվարին։
Տնտեսական համագործակցություն
Կողմերը մեծ ուշադրություն են դարձրել նաև ԱՄՆ և համաշխարհային շուկաներ ռուսական դիզելային վառելիքի մատակարարման վերաբերյալ համաձայնագրերի իրականացման հետ կապված հարցերին, որոնք Վլադիմիր Պուտինը և Դոնալդ Թրամփը քննարկել էին հոկտեմբերի 9-ի հեռախոսազրույցի ժամանակ։
«Երկու կողմերն էլ ընդգծել են, որ գործարքը ծառայում է ոչ միայն ԱՄՆ-ի և Ռուսաստանի շահերին, այլև կնպաստի համաշխարհային վառելիքի շուկայում առաջարկի և պահանջարկի կայունացմանը։ ԱՄՆ վարչակազմի կողմից ռուսական դիզելային վառելիքի նկատմամբ որոշակի պատժամիջոցների վերացումից հետո այս ոլորտում գործնական աշխատանքներն արդեն սկսվել են»,- հայտնել է նա։
Եռակողմ հանդիպում Չինաստանում
Ուշակովն անդրադարձել է նաև Չինաստանի, ԱՄՆ-ի և Ռուսաստանի նախագահների հնարավոր հանդիպմանը չինական Շենժենում նոյեմբերին անցկացվելիք Ասիա-խաղաղօվկիանոսյան տնտեսական համագործակցության շրջանակում:
Նա ասել է, որ երեք երկրներից և ոչ մեկը չի մերժել այս գաղափարը, ապա հավելել է, որ հյուրընկալող կողմն է պատասխանատու նման հանդիպումներ կազմակերպելու համար և արդեն աշխատում են նախապատրաստական աշխատանքների վրա։ «Եթե հանգամանքները բարենպաստ լինեն, իհարկե, մեր չինացի բարեկամները նման հանդիպումը կներառեն Շենժենում կայանալիք գագաթնաժողովի ծրագրում»,- ասել է նա։
Փոփոխություններ մոտեցումներում
Ավելի ուշ Ռուսաստանի նախագահի օգնականը լրագրող Պավել Զարուբինի հետ զրույցում ասել է, որ պատմել է Մոսկվայի արձագանքի մասին ամերիկյան կողմի առաջարկներին, որոնք Օսլոյում պատրաստվել էին եվրոպացի առաջնորդների հետ բանակցություններից հետո։
«Ամերիկացիները որոշ նրբերանգներ են զգացել եվրոպացի առաջնորդների, մասնավորապես ներկաների վարքագծում,- այնտեղ են եղել Եվրոպական հանձնաժողովի, ՆԱՏՕ-ի ներկայացուցիչներ, ամերիկացիներն ինչ-որ նոր նրբերանգներ են զգացել։ Նրանք մեզ պատմեցին դրա մասին, սակայն մենք այդ նրբերանգներից, այսպես ասած, այդքան էլ գոհ չենք»,- ասել է Ուշակովը:
Միաժամանակ ռուս պաշտոնյան ասել է, որ հակամարտության կարգավորման հարցում մոտեցումը սկսել է փոխվել։ «Գոնե նրանք սկսել են մտածել և ավելի լուրջ մոտեցում ցուցաբերել այս ճգնաժամի լուծմանը», - ասել է Պուտինի օգնականը։
Ուշակովը նաև նշել է, որ պատերազմի կարգավորման գործընթացը մոտենում է ավարտին: «Չգիտեմ, թե որքան մոտ ենք, բայց մենք շարժվում ենք այդ ուղղությամբ», - ասել է նա՝ պատասխանելով պատերազմի ավարտի հեռանկարների վերաբերյալ հարցին։
Կիևը կողմ է եռակողմ ձևաչափի վերականգնմանը
Ուկրաինայի նախագահ Վլադիմիր Զելենսկին արձագանքել է՝ հայտարարելով, որ աջակցում են եռակողմ բանակցությունների վերաբերյալ ԱՄՆ առաջարկին և ցանկալի է՝ ոչ ուշ, քան նոյեմբերի սկիզբը։
«Մենք ստացանք արձագանք, ինչպես հասկացանք ճեպազրույցից, որ Ռուսաստանը աջակցում է մեր թիմերի մակարդակով եռակողմ հանդիպմանը։ Ամերիկյան կողմն առաջարկում է այն անցկացնել հնարավորինս շուտ։ Մենք աջակցում ենք դրան»,- ասել է Զելենսկին։