GHADC election-ko somoi gita ong·atchina dabia
TURA: Garo Hills Autonomous District Council (GHADC)-ni constituency-rangko gital dake sima salpiltaianio, GHADC-ko election-ko ong·atninggija council-ni term-ko ra·dodaproroengani gimin Tura-ni MDC aro Bharatiya Janata Party (BJP)-ni state vice president Bernard N Marak sing·doataha.
Iani bidingo a·dokni Deputy Chief Minister aro District Council Affairs (DCA) Minister Prestone Tynsong-na sedoatengon, Delimitation Committee-o political party-rango bak ong·enggipa manderangkoba bak ong·ataha ine adita salrangna skang ong·atgipa GHADC session-on parak ong·ahani gimin ian manderangna ka·dongchakna man·gijaniko ra·baaha ine Marak parakataha.
Marak-ni parakatani gitade, ia Delimitation Committee-ni chairman aro mitam member-rangara, political party-rango bak ong·giparangsa ong·a aro mitamde National People’s Party (NPP)-ni member-rangan ong·a.
Political party-rango bak ong·paaiani giminde ong·gija dakanirangko mesoka ong·ja ine ku·rachakangengon, GHADC-ni constituency-rangko gital dake sima salpiltaianio maming ong·gija dakanirang dongjana gita sorkarian daitoko jako ra·na nangachim ine Marak parakataha.
Constituency-rangni simarangko salpiltaianio manderang baksa chanchirimchenganirang dongjaha ine sorkariko sing·doatengon, iani bidingo district council-ni seoka man·gipa member-rangnaba mamingkon tale u·iatjaha aro an·tangtangni nangnikanirangko ku·pattie on·naba chol on·jaha ine Tura MDC matnangataha.
Constituency-ni simarangko taridapengon pangnan seoka man·gipa dilgiparang aro nangchakea man·gipa constituency-ni manderang baksade agangrikchengna nangachim ineba Marak parakataha.
Constituency-ni simarangko taridapanio maini gimin election-na skang matchotatna man·jaha ine sing·doatengon, simarangko taridapanio maini gimin manderangni chanchiani aro nangnikanirangko ra·na gita public hearing-rangkoba ong·atjaha ine Marak sing·doataha.
GHADC-ni term-ko da·o jadokna ra·dodapattaiahani gimin sorkariko sing·doatskaengon, constituency-rangni simarangko gital dake salpiltaianiko matchotatna council-ni term-ko ra·dodaptelna nangahama ma ian election-ko ong·atninggija donna gita miksonganisa ong·aiama ine Tura MDC sing·doataha.
Indake ong·engon, delimitation proposal-ko jinmana chapa ka·e on·china, nangchakea man·gipa constituency-rango public hearing-rangko ong·atchina, MDC-rang aro Nokmarang baksa tom·anirangko ong·atchina aro Delimitation Committee-ni bidingo jinmana parakchina Marak dabiangaha.
GHADC election-ko ta·raken somoi gita ong·atchinaba Tura MDC dabiangaha.