AMPATI: Ma·giparangna an·pakani somoio an·seng baljokaniko on·na aro atchidaldal bi·sarangna simsak nirokaniko on·na gita Bristibar salo, Mahendraganj Community Health Centre (CHC)-ni Medical Superintendent aro Senior Medical & Health Officer-in-Charge Dr NA Khan, CHC-ni ning·o donggipa dingtang dingtang health centre-rangona re·ange, ma·giparangna aro bi·sarangna CMSMS-ni bosturangko suale on·angaha.
Ma·giparangna aro bi·sarangna CMSMS-ni bosturangko suale on·anganio, Dr Khan baksana Mahendraganj CHC-ni dingtang dingtang official-rang, nurse-rang aro gipinrangba dongpaaha.
Ia CMSMS-ni bosturangara, an·pakdaldalgipa ma·giparangna aro atchidaldal bi·sarangna an·seng baljokaniko on·na, rongtal an·talaniko rakkina, sok kanani aro somoi gita sanna bananirangko ra·na didiani bak gita suale on·gipa bosturang ong·a.
CMSMS-ni bosturangko suale on·na aro sanchakram biaprango sanna banani kamrangko nipilna gita Dr Khan, dingtangmancha Ghegapara aro Kamarpara Urban Health & Wellness Centre-rangonaba re·angaha.
Dingtang dingtang health program-rang, jekai Tuberculosis (TB) Program, Non-Communicable Disease (NCD), Malaria Control aro gipin program-rangni kamrangko nipilna gita ua Bortola-onaba re·angaha.
Manderangna an·seng baljokaniko on·anio kamrangko nina gita Dr Khan aro uni dol, Baksapara-o ong·atenggipa Health Mela program-onaba re·angaha.