ONGWEDIVA- Omukulunhu wopolifi moshitukulwa shaShana Commissioner Andreas Shilelo okwa koleka ta ti fiyo onena ka pe na omunhu a kwatwa po mekwatafano leumbo lomuhongifikola eshi la vakwa omaliko aeshe.
Okwa ti opolifi oya li kuninga omakonakono ashike ka ka pe na ouyelele kombinga yoshikumhungu eshi.
Oshiningwanima osha ningwa konima yeemwedi mbali da dja ko modoolopa yaNgwediva extension 14, efimbo lomutenya.
Opolifi oya hokolola tai ti omuhongifikola ou okwa hangika e li koilonga pefimbo eumbo laya la ponokelwa koolyamupombo.
Otaku hokololwa kutya meumbo omwa vakwa omaliko e li pongushu yoshimaliwa N$38 000 ashike inaa monika fiyo onena.
Omwa vakwa oinima ngaashi eembete, eekompiuta mbali, oikutu, ombakumbafa, eembiya, oikulya, Tv nosho tuu omaliko a yooloka.
Opolifi oya hokolola tai ti omukainhu ou meumbo oha di nomunhu umwe ashike pefimbo eumbo la vakwa naye ina hangika meumbo.
Ovashiinda vati navo ina va uda tuu nande omalinyengo omunhu ta londeke oinima motuwa. Opolifi oya ti eshi mwene weumbo a dimbuka okwa hanga omuvelo weumbo wa tewa nomalola otuwa a dja moluumbo.
Otaku hokololwa kutya ovaashinda navo ova ningilwa omapulapulo ashike ova popya kutya kave na ouyelele kombinga yoshikumhungu eshi.
Opolifi oya weda po tai ti mepandaanda omo ha mu di omuhongifikola ou omu na eumbo li na oufano ashike eshi kwa ka ta li ka ka kuna sha oudivo tava ulike.
Okwa kumaida oshiwana opo shi kale shina ekwatafano liwa novashiinda shavo shaashi eshi otashi kwafele okulongela kumwe okundeka oumbudi womomaumbo.
“Omunhu ngeenge ita di mo muembo na kwashipaleke kutya okwa fiya po ou ta tonatele eumbo. Ovanhu nava lombwele ovashiinda shavo kutya otava dipo opo a tale peumbo,” ta ti.
Okwa ti oumbudi womaumbo taa tewa owa hanya paife monooli unene tuu meedoolopa.
The post Oonakuteya eumbo lomuhongifikola inava monika natango appeared first on New Era.