Shillong, Risaw 12 : Arbnai hadien ka jingkular ban leh eiei, ka Tnad Urban Affairs kan dang ban ai jingpynshai halor ka jingkynnoh shna beain ia ka mandir ha phyllaw ka Ophis CBI ha Mawdiangdiang, ong ka Khasi Students Union (KSU) ha ka sngi Nyngkong.
Kum ka jingpynkynmaw biang ia u Director ka Tnad Urban Affairs, ka KSU Shillong Mihngi Circle kala ong ba haduh mynta ka tnad kam pat aiktien satia halor ka kaiphod leit jurip, ka jingpyntip ia kaei kaba jia ba man halor kane ka kam bad ka sienjam ba kala shim kat kum ka ain naduh ba iashong jingialang ha ka 11 tarik Nailar.
Ka Seng, lyngba u Assistant General Secretary Celestine Rynghang, kala buh jingkylli la kane ka jingtei ka shah kynthup hapoh ka Land Agreement kaba iasoi nyngkong (original).
Kat kum ka jingong ka KSU, ka land agreement ka shah ban tei tang ia ki Iingsah bad ka Ophis ha kane ka jaka, hynrei ha ka jingleit jurip ha katei ka jaka la lap pynban ia ka jingmih ka jaka mane blei hapoh ka phyllaw.
“Kane ka pynmih ïa ki jingkylli kiba kongsan kiba donkam ban hap pynshai, kiba ïadei bad ki jingbit ba la ai, ki kyndon ba la buh ha ka jingïateh soskular, bad la bud ne em ïa ki aiñ bad ki kyndon kiba treikam,” la ong ka seng.
Ka seng ka la pynpaw ia ka jinglyngngoh ba ki nongialam ka seng kila shah khot hajir ha ki pulit halor kane ka kam, katba ka tnad pat kam pat batai shai satia ïa ki sienjam ba ka la shim.
“Ka Seng ka kwah ban tip la ka tnad Urban Affairs kala shim ia ki sienjam ba donkam kat kum ka ain haba iadei bad kane ka jingtei bad, lada lah shim, kaei ka jingmih na kine ki sienjam bala shim” kala pynpaw.
Haba pan ia ka jubab kaba shai bad ba bniah, ka KSU kala buh ia san tylli ki jingkylli – kaei kaba jia ba man halor ka jingkular ban leit jurip ia ka jaka, ka jingshong ain jong ka jingai jingbit ban tei ia ka jaka mane blei, hato lah dei ioh ia ka jingmynjur ka Dorkar Shnong, kaei ka jingpynshitom ban ai lada don ka jingpynkhein, bad balei kala don ka jingpynslem ha kaban ai jubab.
Haba pynskhem ia ka nongrim, ka KSU ka ong ba ka pyrshah ia kino kino ki jingtei kiba pynkhreh ia ki kyndon iateh soskular bad ki ain ba treikam mynta bad dawa ruh ia ka jingtohkit kaba don ia ka por bala buh ban pyndep.
Haba maham ba kane ka kam ka lah ban nang jur, ka seng ka ong ba lada kam ioh ia ka jubab kaba hun hapoh ka por kaba biang, ka “lah ban pynbor ia ka seng ban pyrkhat ha ka ban shim ïa kiwei pat ki sienjam kiba kham tyngeh hynrei kiba katkum ka aiñ, haba dawa ban leh eiei noh kat kum ka lynti kaba dei.”
Pule ruh : Ki samla ka Meghalaya kin nym ngop ha ka jingiakhih ka CJP, ong u bah Sniawbha
Peit ruh
Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.
Bud ruh ia ki ha ka
Twitter – twitter.com/nemediahub
Youtube channel – www.youtube.com/@NortheastMediaHub2020
Instagram – www.instagram.com/ne_media_hub
Download ia ka app jong ngi na playstore – Northeast Media Hub
The post Byrngem ka KSU ban iakhih halor ka Mandir ha phyllaw CBI | Aipor ia ka Tnad Urban Affairs appeared first on Hub News.