Rerapara, Oct 20: South West Garo Hills a·jao Rerapara Community & Rural Development (C&RD) Block-ni gital office building-ko Mongolbar salo, Meghalaya a·dokni Chief Minister Conrad K Sangma, Gambegre MLA Mehtab Chandee A Sangma, Mahendraganj MLA Sanjay A Sangma aro Rangsakona MLA Subir M Marak-ni dongpaanio, nokdonggae on·angaha.
Ia tom·anio a·dokni Chief Minister, Rerapara-ni A·king Nokma aro uni ma·drangrangko, ia block office-ko rikna a·arangko on·gilahani gimin mittelpilangaha.
Ia tom·anio a·dokni Chief Minister, Garobadha-oni Tura-ona dakanggipa Agia-Medhipara-Phulbari-Tura (AMPT) ramako tarina pangchakaniko songe on·angjolenba, Rerapara-ni Samandalgre-o gital rikgipa dolongkoba oprake on·angaha.
Ia tom·bimonganiko ong·atanio a·dokni Chief Minister, jinmana aganprakangengon, a·doko Secretariat-an chubatgipa gadangni office ong·naba gnang indiba manderangna dangdike on·aniode, Block Development office-rangan mongsongbatgipa office ong·a ine aganaha.
Sorkarini bang·bata scheme aro program-rangkon block office-rang gitasa chu·sokate on·a ine janapatengon, block office-rango BDO aro gipin kam ka·giparang, kamtangtangko name ka·a ong·ode, manderangni nanganirangoni 75 percent-kode chu·sokate on·na man·aigen ine Chief Minister aganaha.
Batanggimin bilsirango a·dokni block office-rangko chalaianio chagrongna nanggipa neng·nikanirangko janapangengon, a·doko 70 percent block office-rangkon para ra·esa chonchongipa nokrango chalaiachim indiba ia sorkari, kam ka·giparangni neng·nikanirangko ma·sichake, a·dok gimikon block office-rangko gital rikna aro taridapna gita gong crore 200-mangni gita tangkarangko chame on·aha ine Chief Minister parakataha.
Dingtang dingtang department-rangoba dingtanganiko ra·bana sorkari kam ka·enga ine janapatskaengon, a·dok gimiko dam 2000-na baten sorkari skulrangko rikaha aro mitamrangko taridape on·aha ine Chief Minister aganaha.
An·tangko Meghalaya dolni captain gita toe janapangengon, sorkario kam ka·giparang pilakkon a·dokni Chief Minister, ka·sachakani, ka·dongani, kakket ong·ani aro manderangna ka·saani gnang dangdike on·china didiangaha.
The post Rerapara Block-ni gital office building-ko CM nokdonggae on·a appeared first on Hub News.