Ռուսաստանը Կիևում և Խարկովում բնակելի շենքերի է հարվածել, կան զոհեր և վիրավորներ

«Ժամը 21:00-ի դրությամբ հաղորդվել է 59-ամյա կնոջ մահվան մասին։ Տան մոտ գտնվող մեքենայում հայտնաբերվել է ևս մեկ անձի դի»,- ասվում է Դատախազության տարածած հայտարարությունում, ըստ որի՝ յոթ վիրավորների թվում 17-ամյա մի աղջիկ կա։

Ուկրաինայի նախագահ Վլադիմիր Զելենսկին հայտնել է, որ անօդաչու թռչող սարքի հարվածի հետևանքով ինը մարդ է տուժել:

«Սա ևս մեկ ապացույց է, որ Ռուսաստանը պետք է ավելի մեծ ճնշման ենթարկվի։ Հենց նրանք են շարունակում դաժան հարձակումները։ Նրանք են, որ երկարաձգում են պատերազմը։ Նույնիսկ հիմա, ի պատասխան ամերիկյան առաջարկի, նրանք օգտագործում են «Շահեդներ»։ Մենք հույս ունենք, որ Միացյալ Նահանգները կտեսնի Ռուսաստանից եկող այս ազդակները և կգործի վճռականորեն», - գրել է Զելենսկին։

Զելենսկին նաև ասել է, որ ԱՄՆ նախագահ Դոնալդ Թրամփի կողմից էներգետիկ հրադադարի մասին երկու երկրների համաձայնության գալու մասին հայտարարությունից մի քանի ժամ անց Ռուսաստանը հարվածել է Ուկրաինայի վեց էներգետիկ օբյեկտների։

Երեկ երեկոյան ռուսական անօդաչու թռչող սարքերը հարձակվել են նաև Խարկովի վրա։ Շրջանային վարչակազմի ղեկավար Օլեգ Սինեգուբովի խոսքով՝ հինգհարկանի բնակելի շենքի վրա հարվածի հետևանքով վիրավորվել է վեց մարդ։

«Վիրավորների թվում կա 19-ամյա մի տղամարդ, որի վիճակը ծանր է, նա ստացել է ծանր այրվածքներ», - գրել է Սինեգուբովը։

Խարկովի քաղաքապետ Իգոր Տերեխովի խոսքով՝ քաղաքը հարձակման է ենթարկվել «Բանդերոլ» տեսակի անօդաչու թռչող սարքերով։ Հաղորդվում է, որ վնասվել է առնվազն վեց մասնավոր տուն։