Shillong, Oct 19: United Democratic Party (UDP)-ni sakgittam MLA-rang, Sombar salo, National People’s Party (NPP)-o napangaha aro ia MLA-ranga, Mawkyrwat-ni MLA Renikton Lyngdoh Tongkhar, West Shillong MLA Paul Lyngdoh aro Mowkaiaw MLA Nujorki Sungoh ong·a.
Ia sakgittam MLA-rang, NPP-o napna gita Sombar salo, Meghalaya Legislative Assembly-ni Speaker Thomas A Sangma-ko gronge, an·tangtangni lekkarangko on·angaha.
NPP-o napna tik ka·ani bidingo talate on·angengon, batanggimin somoirango uamang, joltangni party-rangko, Regional Democratic Alliance (RDA)-o ku·cholsan bakrimatna jotton ka·ahaoba chu·sokna man·jahani gimin NPP-o napna tik ka·aha ine Mawkyrwat MLA Renikton Lyngdoh Tongkhar parakataha.
NPP-ni dilgiparangara, joltangonin ong·e national party-ba ong·ani gimin uamang NPP-kon baseaha ineba ua aganaha.
Adita salrangna skangsan UDP-ni sakchet MLA-rang, Bharatiya Janata Party (BJP)-o napangani ja·man UDP-o sakbri MLA-rangsan dongaiahachim aro da·o ia sakbri MLA-rangoni sakgittamba NPP-o napahani gimin UDP-o MLA saksasan dongaiaha.
Tenth Scheduled-ni Paragraph 4-o dongimin niam gitade, badiaba party-oni ong·kate gipin party-o napskana gita member-rang komibeoba bakgittamoni bakgni ong·na nanga indiba NPP-o napanggipa MLA-rangde, UDP-o bakbrioni bakgittam ong·ani gimin ra·galako man·nani ong·jaenga.
UDP-ni sakgittam MLA-rangba da·o NPP-o napahani gimin Assembly-o NPP-ni member-rang gimik sak 36 gapaha aro ian Chief Minister Conrad K Sangma-chi dilenggipa Meghalaya Democratic Alliance (MDA) sorkario NPP-ko mangrakbatataniba ong·aha.
The post UDP-ni MLA sak 3, NPP-o napa appeared first on Hub News.