TURA: West Garo Hills a·jani Bhaitbari sepangjolo niam gri chalaienggipa bol ratani karkana ba sawmill-ko Forest Department Butbar salo chipataha bol ratani kolrangkoba oke ra·angaha. Belbari aro Gasbari Sorokpara jolrango niamgri bol ratani karkanarangko chalaiengani koborko man·soe Divisional Forest Officer-ni ge·etaniko man·e Hollaidanga Range-ni Range Officer-ni dolko dilanio West aro South West Garo Hills Territorial Division am·sandina a·bachengataha.
Uandake uamangni am·sandianio Belbari aro Gasbari Sorokpara-o niamgri chalaienggipa bol ratani karkanako nikeaha aro bolrangko aro bol ratani kolrangko ra·sekangaha. Ra·sekgimin bol aro bol ratani kolrangko Holliadanga Range Headquarter-ona ra·angaha.
Niamgri bol badingani aro bol ratani karkanarangko chalaigiparangni kosako mikkangchiba sandiangkugen ine Divisional Forest Officer Rupanker K Marak mikrakataha.