Hambeleleni Daniel
Ananias Matias okwa ti okuudite etumba okukala ta longifa ounongo waye nelalakano lokutandaveleka etumwala londjovo yomwene tashi pitile mokuimba omaibilo opamhepo.
Omukalimo womomukunda Omboloka okwa ti natango ota tandavaleke etumwalaka loukumwe nolombili muAfrica.
Matias okwa ti omaimbilo aye otaa lalakanene okueta po ombili osho yo okuxwaxwameka elongelokumwe.
Okwa ti okwa tameka okuimba omaimbilo opamhepo omudo 2024 noalbuma tai ti “Nandi kale eendjovo daye.” Naashi okwe shi ninga omolwohokwe yomaimbilo opamhepo e hole nokwa hala ovashikingalo vakwao va kufe oshiholelwa kuye.
Matias okwa ti okudja peedula dishona okwa dja e hole okupwilikina eengalo da ‘Lala Sackeus’.
Okwa yelifa ta ti eshi oshe mupa ohokwe yokushika eengalo nokwa kala ehole okumutwa omukumo.
“Okangalo kange ka xuuninwa oko taka ti , ‘Bless Africa’ eilikano ta li kufa po omashongo aa taalelwa kOvafrica ngaashi oluhepo, ondjala,eehongo lihe na ongushu, outondwe osho yo onghalo yokulonga oimbuluma,” ta ti.
Okwa yelifa ta ti eshi osha hala kutya ngeenge ovanhu tava ilikana nena otashi kwafele okulwifa omashongo opanghalafano.
Okwa ti eengalo dopamhepo otadi hekeleke oshiwana osho yo okuyandja ehongo nghene ovanhu ve na okuliumbata.
Matias okwa ti okwa taalela omashongo unene tuu oshimaliwa opo a dule okupitifa eengalo dipe.
Okwa weda po ta ti eshongo likwao okukala ta ufanwa keenhele aka mwenyeke oshiwana ashike iha futwa.
Omunyasha ou okwa ti nonande a taalela omashongo eshi itashi mu teya omukumo wokulongifa ounongo waye.
Okwa kumaida ovanyasha vakwao opo va twikile okulongifa ounongo wavo osho yo okukala kokule nokulonga oimbuluma.
-hambelelenindaniel56@gmai.com
The post Ta tandaveleke ondjovo yomwene meengalo appeared first on New Era.