Shillong, Risaw 13 : U Myntri Rangbah ka Jylla Conrad K Sangma ula bthah ia ki education fellows ne ki nongai jinghikai bala thung kyrpang hapoh ka Chief Minister’s Leadership in Education and Development (CMLEAD) Fellowship, ba kin leit jurip man ka por sha ki skul, shim jingkhein ia ki jinglong jingman bad ai jingmut ia ki sienjam ban pynjanai ia ka jingmih na ki jingpule ha kylleng ka Jylla.
Haba iakren bad ka nongiashimbynta ba nyngkong eh ha kane ka fellowship ha ka jingialang ban pynrung kami a ki hapoh ka Iingsah jong u ha Shillong, hynne ka sngi Ba-ar, u Conrad ula ong ba ki fellows ki lah ban iarap ban pyniasoh hapdeng ki prokram ka Sorkar bad kaei kaba ki khynnah pule ki mad ha ki kamra shong klas.
U Myntri Rangbah bad u Myntri ka Tnad Pule Puthi Bah Lahkmen Rymbui, kila aiti ia ki laptop sha kine ki fellows, ki ban leit ai jingshakri ha baroh ki 12 tylli ki district ka Jylla.
Kane ka Fellowship prokram ka Sorkar kan buh ia ki samla bala biang ka kyrdan pule hapoh ka rukom treikam ka Tnad Pule Puthi, ha kaba kin trei ryngkat bad ka Samagra Shiksha, ka Directorate of Educational Research and Training (DERT) bad ki District Education Officer, ban kyrshan ha ka jingpyntreikam ia ki prokram kiba kongsan.
Haba ban jur ia ka jingdonkam ban ioh ia ka pule dangle kaba bha nalor ki jingtei, u Conrad ula ong ba ka jingtei ia ki Iing skul marwei kam lah ban pynthikna ia ka jingioh jinghikai kaba bha.
“Ban shna ia ka building thymmai kam dei ka jingpynbha ia ka pule dange. Ka dei ka jingai ia ka jingtei. Hynrei ka pule dangle kan bha haba ki jingtei ki iarap ia ki khynnah ban ioh ia ka jingnang jingstad bad haba ka kyrdan jong ka pule puthi ka kiew” ula ong.
U Conrad ula bthah ia ka Tnad Pule Puthi ba kan bynshet ha kine ki education fellows ia ki kam ba kin leh, ka jingbuh ia ka thong bad ka rukom ai ia ki jingtip, ka ban kyrshan da ki jingthew kiba lah ban thew bad ka jingkitkhlieh.
Ula ai jingmut ba man ki fellow kin leit la kumno kumno ruh kawei ka skul man ka taiew bad ban aiti ia ki kaiphod bishar bniah kiba kynthup naduh ki jingtei, ki jaka leit bar, ki shuki bad ki miej bad ka kyrdan jong ka jinghikai. Ki kaiphod ki dei ruh ban kynthup ïa ka jingpeit bniah la ki skul ki don ne em ïa ki painkhana kiba kyrpang na ka bynta ki khynnah kynthei, bad ban lum jingtip ïa kiei kiba ki khynnah skul ki ong.
Nalor ka jingkhmih bniah ia ki skul, u Conrad ula kyntu ia kine ki fellow ba kin pynshlur ïa ki paidbah ha ki shnong ban ïatreilang ban kyrshan ïa ki skul kiba ïakynduh jingeh.
U la ai jingmut ba ki fellows kin ïakynduh ïa ki rangbah shnong, ki nongïalam balang, ki khynnah skul bad ki seng trei mon sngewbha, khnang ban pynshlur ïa ki ban leit jngoh ïa ki skul man ka por bad ban ai jinghikai khlem jingsiew.
U la ong ba ki dkhot jong ka imlang sahlang ki lah ban pynlut shi kynta ne ar kynta ban ïarap ïa ki khynnah, ban hikai ïa ka ktien Phareng, lane ban shim ïa ka jingkitkhlieh lang ban kyrshan ïa kawei ka skul.
Peit ruh
Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.
Bud ruh ia ki ha ka
Twitter – twitter.com/nemediahub
Youtube channel – www.youtube.com/@NortheastMediaHub2020
Instagram – www.instagram.com/ne_media_hub
Download ia ka app jong ngi na playstore – Northeast Media Hub
The post “Kawei ka skul ha ka shitaiew” : Buh kyndon u CM ia ki Education Fellows appeared first on Hub News.