ДУШАНБЕ, 15.10.2026 /АМИТ «Ховар»/. 17–18 октябри соли 2026 дар шаҳри Кӯлоб Ҷоми Президенти Ҷумҳурии Тоҷикистон оид ба гӯштини ҷудо баргузор мегардад. Дар ин мусобиқаи сатҳи баланд беҳтарин ҷудокорони мамлакат ҷамъ омада, барои ба даст овардани унвони қаҳрамонӣ ва нишон додани маҳорати варзишӣ сабқат хоҳанд кард, хабар медиҳад шореҳи варзиши АМИТ «Ховар».
Ин мусобиқа яке аз рӯйдодҳои муҳими тақвими ҷудои Тоҷикистон ба ҳисоб рафта, барои муайян намудани варзишгарони беҳтарин ва фароҳам овардани шароити рақобати солим байни ҷудокорони мамлакат имкони хуб фароҳам меорад. Ҳадафи асосии баргузории Ҷоми Президенти Тоҷикистон кашфи истеъдодҳои ҷавон, баланд бардоштани маҳорати касбии варзишгарон ва омода намудани насли нави қаҳрамонони ҷудои тоҷик мебошад. Чунин мусобиқаҳо ба ҷалби ҷавонон ба варзиш, тарғиби тарзи ҳаёти солим ва рушди минбаъдаи ҷудо дар кишвар мусоидат мекунанд.
Барои ҷоизадорони Ҷоми Президенти Тоҷикистон оид ба гӯштини ҷудо дар маҷмуъ 1 миллиону 260 ҳазор сомонӣ мукофотпулӣ пешбинӣ шудааст.
АКС аз манбаъҳои боз
Октябрь 15, 2026 12:00