Ehangano lokutengeka onghalo yomhepo ola holola kutya oitukulwa omuwoi yoshilongo otai ka kala i na etokopyo lomutenya noupyu wa matutu mexuliloshivike.
Nonande oitukulwa imwe unene ngaashi oitukulwa yokonooli oya kala nomutenya moule woshivike, owa teelelwa u ka ye pombada neenghono mexuliloshivike.
Ehangano ola ti oupyu owa tengenekewa uka kale pokati ko 30°C no 42°C.
Oitopolwa yokouningino, pokati koshilongo ndele fiyo ouninginino oya lopotwa oyo unene tai ka kala i na omutenya noupyu wa matutu.
Oitukulwa ya tengenekwa tai ka kala moshipilili shoupyu ongaashi: Ohangwena, Oshikoto, Oshana, Omusati, Zambezi, Kavango-East, Kavango-West, Kunene, Otjozondjupa osho yo oshitukulwa shaKhomas.
Omushangwa wa dilila kouministeli woilonga noyeendifo mekwatafano nomahango etengeneko longhalo yomhepo owa yelifa kutya omutenya osho yo omhepo ipyu otau ka kala wa ndjena neenghono novakwashiwana otava indilwa va kale momaumbo vo tava nu omeva mahapu.
“Elalakano lokunwa omeva okukale ka olutu li na oikunguliki ya wana,” tava ti.
Onhumwafo oya ti ngaashi mo Khomas oupyu otau ka tameka nena ndele tau tavakana wa finda komafuta.
Omukulunhu koshikondo shetengeneko longhalo yomhepo Simon Derick okwa ti ovanhu nava kale momaumbo unene okudja peetundi 12h00 fiyo 15h00.
Okwa fatulula kutya peevili odo opo ha pu kala unene pwa djena okuyelekanifa neevili dikwao defiku.
Dirkse okwa indila keshe omudali ena okaana kanini, ovakulupe osho yo ova vena oulema woshipa shitilyana va kale va tonatelwa vo va fiilwe oshisho.
Ndokotola umwe womoshipangelo shaShakati oo a pula aha tumbulwe kedina okwa ti ovanhu vahapu ohava kala vena ouhefi nomalutu avo. Ta ti ovanu otava ende ashike momutenya vo i na va djala oikutu yokuli amena komutenya.
“Okaangela yokoshipa oko ashike hai dilile oko. Ngeenge omwa tokola okuenda momutenya uli ngaha. Fyeni oshisho kutya omwe li amena nokudjala oikutu yomaoko ale. Mwa vava omaadi oku li amena komutenya, opo eene detango diha wile koshipa kwoovene,” Ndokotola ta yelifa.
Okwa indila oshiwana shi li ufe komalombwelo a tulwa po opo va dule oku li amena.
-taimihaihambo2000@gmail.com
The post Namibia a taalela etokopyo lomutenya noupyu mexuliloshivike …. oshiwana sha indilwa shi kale momaumbo appeared first on New Era.