ABŞ və İsrail silahlı qüvvələri İrana qarşı genişmiqyaslı hərbi əməliyyatların mümkün bərpasına hazırlaşır.
Bu barədə “Axios” portalı ABŞ administrasiyasındakı mənbələrə istinadən məlumat yayıb.
Nəşrin məlumatına görə, hərbi əməliyyatların oktyabrın 27-də İsraildə keçiriləcək parlament seçkilərindən və noyabrın 3-də ABŞ Konqresinə aralıq seçkilərdən əvvəl başlanması ehtimalı nəzərdən keçirilir.
Bildirilib ki, ABŞ Prezidenti Donald Tramp və İsrailin Baş naziri Benyamin Netanyahu ötən həftə İrana qarşı yeni genişmiqyaslı əməliyyatın keçirilməsi imkanlarını müzakirə ediblər.
Müzakirələr Trampın oktyabrın 8-də ABŞ-ın Konqres seçkilərinədək İrana zərbələr endirməyəcəyi barədə açıqlamasından əvvəl baş tutub.
Bununla belə, “Axios” yazır ki, ABŞ və İsrail hərbi qüvvələri döyüş hazırlığı vəziyyətində qalır və Trampın mövqeyini dəyişəcəyi ehtimalına qarşı hazırlıqları yekunlaşdırırlar.
Mənbələrin sözlərinə görə, müzakirə olunan ssenari İranın hərbi və nüvə obyektlərinə birgə zərbələrin endirilməsini nəzərdə tutur.
Nəşr qeyd edib ki, ABŞ administrasiyasında belə əməliyyatın əsas tərəfdarları müdafiə naziri Pit Heqset və ABŞ Mərkəzi Komandanlığının rəhbərliyidir. Trampın müşavirlərinin əksəriyyəti isə Tehrana iqtisadi və digər vasitələrlə təzyiqin davam etdirilməsini dəstəkləyir.
Qeyd edək ki, oktyabrın 13-də Donald Tramp ABŞ-ın İranla bağlı növbəti addımlarına dair yaxın vaxtlarda qərar qəbul edəcəyini bildirib.