Omupresidente Netumbo Nandi-Ndaitwah okwa holola kutya oiputudilo yopaungoba otai nghonopeke nokuyambula po eliko loshilongo.
Edi Omupresidente okwe di holola pefimbo lovahongwa va dja koiputudilo itatu yopaungoba taa djalekwa omanguwo moshipopiwa shaye osho a leshelwa komukunhuwiliki woshikondo shokuninga eemhangela deliko loshilongo Kaire Mbuende.
“Oilonga yeni oyeli kalekelwa, ohai eta omakwatafano awa pokati koilongo osho yo okutukulilafana omaunongo a yooloka,” Omupresidente ta holola ngaho.
Oiputudilo itatu yopaungoba monooli oya djaleka omanguwo nokuyandja eendjapo kovalihongi va koya po 600 momaifano a yooloka.
Ovalihongi va pewa eendjapo ovadja koiputudilo ya yooloka ngaashi: Nakayale Vocational Training Center, Valombola Vocational Training Center osho yo Eenhana Vocational Training Center.
Omukulunhu woiputudilo yopaungoba moNamibia Erick Nenghwanya okwa ti i na teelela ovadjali vomanguwo aa va kale momaumbo vapwaalala shaashi ova deulilwa okueta po oilonga kuvo vene.
“Onda hala mu tule omadiladilo eengeshefa da yooloka moilonga. Oilonga ngeenge tai ya, tai hange ngaho tamu ende,” ta tu ovadjali vomanguwo omukumo ngaho.
Nenghwanya okwa ti ovanafikola ava ova deulikika nongeenge tava ka yandja omakwafo moshiwana, ovanhu inava pumbwa okukala tave li pula noudjuu ngeenge tashi ya pokuyandja omakwafo okudilila kuvo.
Nenghwanya natango okwa yandja olupandu laye kepangelo eshi la dimbuluka oiputudilo yopaungoba, moku kala tai va yambidida unene noshimaliwa.
“Paife ngaha shaashi omakwafo opo eli lela, ohatu li haluka tu na ovanhu vahapu tava djala omanguwo, shaashi emono loixuna kali po vali,” ta ti.
Okwa twikila kutya eshi oshe va pa nokuli neenghono opo va dule okuweda mo vali omaifano a yooloka taa dulu okukala eli hongelwa.
“Otwa hala nokuli ngeenge oinima aishe oya ende nawa, tu kufe oiputudilo pondodo apa ili tu itule pondodo yo hatu ifana ‘ocollege’,” ta ti.
Nenghwanya okwa weda po ta ti ngeenge ova mono omhito yokutula oiputudilo yavo pombada ngaha, nena ova teelela okukala vena ovahongi tava di movanafikola vavo ava va deula.
Pefimbo loshitufi eshi opa li yo Dika Mokoena oo eli Omukulunhu koshiputudilo sho Orbit College mo South Africa osho nasho hashi ungaunga noinima yopaungoba.
Mokoena okwa ti Namibia oshilongo shina eemhito nale da yeuluka kudo vene.
“Ngeenge omwa kala mu hena oilonga natango ota mu dulu oku li manga oukuni kumwe ndele tamuuya po neeproyeka dina sha nounamapya, nyee tamu tameke oku ninga eengeshefa,” ta ti.
Okwa weda po yo kutya Namibia na South Africa nave li mange kumwe opo va dule oku li kufa koshi moshikondo shopaungoba.
The post Oiputudilo yopaungoba otai yambula po eliko loshilongo-NNN… Ve dule po 600 va djala omanguwo appeared first on New Era.