Hambeleleni Daniel
Omukuluwonale okwa tile ‘omutumba efete sho shiwa iha shi di pokapala ka yela’. Onghene, Auleria Uupindi okwa dja momutumba eshi a tokola opo a hovele okulandifa oikulya yoshiwambo.
Uupindi ota hangika koshi yomwoongo mOngwediva popepi nediki loipindi ha li ifanwa Marula mall.
Uupindi oha landifa omaludi oikulya ngaashi oshikundu,oxuxwa yoshiwambo,omaungu,oukuki, ouleke, oingumutulu naikwao ihapu.
Elalakano laye lokulandifa okulundulula onghalamwenyo yaye i mu ningile ipu.
“Ame onda hala okukala nda fikama kwaame mwene opo ndi ha ka kume oinima yovanhu opo ndi kwafe oludalo lange,” Uupindi ta ti. Meenghudafana noshifo eshi, Uupindi okwa holola kutya molweendo lokutameka ongeshefa okwa didilike kutya omunageshefa owa pumbwa okukala omulininipiki ove ouna eitavelo opo u hange efikilo loye.Okwa ti ongeshefa kaifi oshinima shipu, hayo yokunhukilwa komunhu ha shuna momima diva molwaashi oyiyadi di omashongo.
Okwa ti petameko, okwa kala e udite a loloka a hala nande okweefa po ongeshefa ashike okwa kendabala nafiyo osheshi eli ponghatu opo eli nena.
Natango okwa ti ovakwashiwana vakwao iha va kala ve udite nawa osheshi ove wete vati ta mono oshimaliwa shihapu.
Ta weda po kutya omaliudo oo ka e li mondjila oshe shi nae ota kendabala ashike.
Ta ti nonando mongeshefa yokapana mu yadi omashongo , inae mu shuna monima.
Uupindi okwa ti okwa kala a tuwa omukumo kovakwanendimo osho yo ye mwene. Okwa ti ngeenge owa hala okukala omunangeshefa muwa, kala omulididimiki ushi okulonga novanhu.
“Onda kala ndi na eitavelo momutima wange kutya fiku limwe onashi ka ende nawa ashike,” ta holola ngaho.
Okwa ti ovanangeshefa vanini otava dana onghandangala moshiwana.
Okwa ti omashongo oshinima shimwe natango hashi mu tu omukumo aye komesho molwaashi okwa itavela kutya onghalamwenyo kai na omashongo ka i shisha.
Okwa ti ngeenge efiku ola pitiko lina ovalandi nawa oha dulu okudimbuka nande onoN$700 molwaashi oku li pondjila opo hapu ende ovanafikola ovapangi noutaxi.
Uupindi okwa ti mongeshefa yaye okwa tungifa mo eumbo laye nokutulifa mo opomba yomeva .
Okwa ti ongeshefa yaye oya ninga elunduluko lakula monghalamwenyo yaye.
Natango okwa ti mongeshefa yaye omo a futile ounona vaye ofikola.
Okwa hokololela Kundana kutya okaana kaye kamwe oka mana nale ofikola ndele omo ashike eka futila mongeshefa yaye omo.
Uupindi okwa ti natango okwa hala okuyandja oshiholelwa koomeme ovo veli ninga ashike vopeekamba va fikame ndele tava tameke eengeshefa davo nakashona oko hava mono.
Natango okwa holola yo kutya okwa tokola okukala ta landifa oikulya imwe yopamufyuululwakalo okukwatela po omufyuululwakalo opo u shiivike kepupi ta li ya.
Okwa ti kumaida ovanhu va va kondjife oluhepo vo va dule okushakeneka epangelo ondjilakati, i na va kala ashike veli omutumba ta va ti epangelo opo li li.
–hambelelenindaniel56@gmail.com
The post Omutumba efete… ta landifa koshi yomuti appeared first on New Era.