OKANGHUDI- Ovakwapata, ovashiinda osho yo Ovanamibia ova tanga omunyekadi omutivali Penehupifo Pohamba kutya okwa li omukainhu omunambili, ehole okuyambidida oshiwana molwaashi okwa li e na olukeno noukumwe.
Pohamba okwa xulifa Olomakaya efimbo lokonguloshi moshipangelo shapaumwene sho Lady Pohamba moWindhoek.
Okwa li e na omido 78.
Okwa fiya po ounona vaye vatano. Pohamba okwa ninga omunynekadi woshilongo okudja omudo 2005 fiyo 2015 pefimbo olo omusamane waye Hifikepunye Pohamba a hoololwa a ninge Omupresidente omutivali.
Okwa kala omupangi keifano konima eshi eli hongela oupangi koilongo ngaashi koTanzania osho yo Jamaica.
Pohamba okwa kala ta longo nondjungu nokuxwaxwameka oomeme ve li umbata nounona opo va kale tava mono omayakulo ouhaku.Omupresidente omutivali Pohamba okwa hangika e li koWindhoek aka talela po omukulukadi waye fiyo ta xulifa.
Ovaleli vopapolitila veendodo da yooloka onghela ova talela po eumbo lavo li li moWindheok okuheleka ovakwanedimo vaye.
Omupresidente Netumbo Nandi-Ndaiwah okwa yandje etumwalaka lomahekeleko onghela ta ti Pohamba okwa li omukainhu a longo noudiinini, nokuhole elandulafano.
“Okwa dana onghandangala ya kula pefimbo loita osho yo konima yemanguluko eshi a kala ta xwaxwameke ovakainhu nounona va mono ouhaku pefimbo,” ta ti. Pefimbo Kundana a taalela po eumbo lavo komukunda Okanghudi moshitukulwa shaHangwena, Loide Iinane ou e li ondenge yanakufya okwa hokolola ta ti okwa kala meumbo pamwe nomukulu waye oule weedula 23, vena ombili nelandulafano.
“Ohandi lili omukulu wange, omuyandjimayelele. Onda kanifa kahewa kange, keshe efimbo hatu li ningi naye omashendjo,” ta ti.
Okwa hokolola ta ti alushe ngeenge ve li meumbo nomuluku waye ohava kala tava yolo, ye te mu pukulula ngeenge a ninga epuko.
Iinane okwa ti Penehupifo okwa fiya po omwaka wa kula movakwapata vaye shaashi okwa kala alushe a lotoka ngeenge mepata lavo mwa holoka oupyakadi.
“Omukulu wange okwa longa nge shihapu. Okwa kala alushe ehole a tu ningi ehandaxa konguloshi manga ina tu ka nangala,” ta ti. Okwa ti ina mona nale omukulu waye te munyengela molwaashi oha kala alushe e na omutima una ombili.
Umwe vomovana, Mandume Pohamba okwa hokolola ta ti ina ka kwa li e na okatongo molwaashi meumbo lavo okwa li ta mu tekulwa ounona vahapu.
“Meme okwe tu honga outeku, okukala twa fimaneka ehongo. Meme okwe tu longa kombinga yonghalamwenyo nelalakano tuha longe oinima ya puka,” ta ti.
Tilde Sheendelwako ou e li omushiinda shavo okwa hohokolola ta ti Penehupifo okwa li e hole ovashiinda shaye molwaashi okwa li alushe e va pe oikulya.
“Ngeenge meumbo lavo muna oshivilo okuhole okutu ifana ndele hatu ka lya eendja detu. Okwa kanifa omushiinda wetu omunambili e hole oshiwana,” ta ti. Okwa weda po ta ti momukunda wavo omu na ounona vahapu va pewa omakwafo omidjalofikola osho yo okufutilwa ofikola kunakufya.
Omalongekido epako laye oku li metifa noshiwana otashi ka shiivifilwa nale.
-fhamalwa@nepc.com.na
The post Oshiwana tashi li li omunyekadi Pohamba… okwa yambidida ovanafikola mOkanghudi appeared first on New Era.