© APA | Antiinhisar və İstehlak Bazarına Nəzarət Dövlət Agentliyinin sədr müavini İlqar Həsənov
16 oktyabr 2026 11:19 (UTC +04:00)
Azərbaycanda dövlət standartlarının sahibkarlıq subyektləri üçün əlçatanlığının genişləndirilməsi və onların praktik tətbiqinin təşviqi nəzərdə tutulur.
“APA-Economics” xəbər verir ki, bunu Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin sədr müavini İlqar Həsənov Ümumdünya Standartlaşdırma Gününə həsr olunmuş media təlimində bildirib.
Onun sözlərinə görə, qarşıdakı mərhələdə əsas prioritetlərdən biri standartların iqtisadiyyatın real ehtiyaclarına uyğunlaşdırılması olacaq.
İlqar Həsənov qeyd edib ki, standartların istehsalatda, xidmət sektorunda və idarəetmə proseslərində tətbiqi məhsuldarlığın artırılmasına, xərclərin optimallaşdırılmasına və məhsulların keyfiyyətinin yüksəldilməsinə imkan yaradır.
“Standartların tətbiqi istehsal prosesində səmərəliliyin artırılmasına, məhsulun keyfiyyət göstəricilərinin yaxşılaşdırılmasına və xərclərin optimallaşdırılmasına şərait yaradır. Eyni zamanda, beynəlxalq standartlara uyğun istehsal olunan məhsulların ixrac potensialı artır”, – deyə o bildirib.
Agentlik rəsmisi əlavə edib ki, standartların dövlətə, cəmiyyətə, sahibkarlığa və ölkə iqtisadiyyatına töhfəsinin artırılması istiqamətində tədbirlər davam etdiriləcək.
