SHILLONG: A·doko lekka porako namdapatna gita Chief Minister’s Leadership in Education & Development (CMLEAD) Fellowship-ko a·dok sorkari a·bachengataha aro ia program-na seoka man·gipa chadamberangko kamo rimnapna gita Mongolbar salo, Induction Ceremony-ko Shillong-o Chief Minister-ni dongchakgipa noko ong·atangaha.
Ia program-ko ong·atanio a·dokni Chief Minister Conrad K Sangma, seoka man·gipa chadamberangna agan-ku·pattianirangkoba on·angjolaha.
Ia program-ko ong·atanio a·dokni Chief Minister aro Education Minister Lahkmen Rymbui, kamo rimnapa man·gipa chadamberangna laptop-rangkoba suale on·angaha.
Ia CMLEAD Fellowship-ara, a·ja damprakprakon lekka porako namdapatna gita dingtang dingtang kamo skia man·gipa chadamberangko kamo bak ong·atna Meghalaya sorkarini a·bachengatgipa program ong·a aro ia chadamberangko, Meghalaya a·dokni pilak dam 12 a·jarangon donatgen. Donata man·gipa biaprango ia chadamberang, chatro chatrirangni skie ra·anirangko namdapatna Samagre Shiksha, Directorate of Educational Research & Training (DERT) aro district education office-rang baksa nangrime kamko ka·gen.
Ia CMLEAD Fellowship-ko a·bachengatani bidingo talate on·angengon, sorkariko chalaianiode dilgiparang aro official-rangsan bak ong·na man·jawa indiba sorkarini kamrangko chu·sokatengama chu·sokatjaenga, uko nina gita songsal aro manderangni bakrimanikoba nangchongmota ine a·dokni Chief Minister aganaha.
Skul nokrangko rike on·ani bidingo janapangengon, gital nokrangko rike on·aiani giminde lekka porako nambatatna man·gen ia katta ong·ja indiba jensalo, bi·sarang skul nokrango poraina cholko man·a, unosa lekka porade nambatna man·a ine Sangma aganaha.
Official-rang aro politician-rangde kamtangtangon bon·aiani gimin skulrango mai ong·enga, uko salanti nirok sandina man·ja aro iako da·o seoka man·gipa chadamberangan kolgapatna man·skagen ineba ua aganaha.
Ia CMLEAD Fellowship-ara, manderangna dangdike on·na gita ia chadamberangna nambegipa chol ong·enga ineba Chief Minister aganaha.
Ia chadamberangna kamrangko name mesoke on·china Education department-ko didiangengon, ia chadamberang sakprakan komibeoba antiprako, skul damprakona re·e, skul nok, toilet-rang, asongchakani aro sechakani, chatro chatrirang baksa agangrike uamangni skie ra·anirangko report on·china Chief Minister ku·pattiangaha.