Okamati oko taka tamanekelwa edipayo nekwatongonga lounona vavali kOkahandja odula ya dja ko, okwa li haka fikola pofikola imwe navo poKW von Marees Combined School manga inaka tulwa pedu konima yeemwedi manga oimbuluma ei inai ningwa.
Omutamanekwa, Karinambande Muundjua (18), okwa lombwela opolifi kutya okwa kwata keenghono nokudipaya Ingrid Maasdorp (5) momafiku 21 Maalisa 2025 osho yo Roswinds Fabianu (6) momafiku 24 Apiilili 2025.
Muundjua oku na nale vati oshipofa inashi pwa konima vati a teta eengodi doufano mofikola, mumwainakadona, oo ita tumbulwa kedina, osho a lombwela oNampa Etitatu ngaho.
Moshikumungu omo Muundjua okwa ti oku na ondjo.
Nande ongaho, ofamili yaye okwa li ya kumwa neenghono noitai dulu okwiitavela kutya Muundjua oye a kala nokulonga oikumwifalonga aishe oyo.
Mumwainakadona, okwa ti mumwainamati okwa li a tulwa pedu kofikola shihe li pauyuki momudo 2024 shaashi okwa li a nwefwa mo kounona vakwao voumati.
Ofamili ohai di mofaalama i li popepi noVerddersdal omo mwa ningilwa oimbuluma ei tai popiwa.
“Omumati wange okwa li muwa eshi ta kulu. Okwa kala nokuyakula nge meumbo ndele onda kumwa neenghono. Ashike nee, onda hala okuyandja ombili keefamili odo da kanifa ounona vado, nonda hala ouyuki u pule komesho,” Selma Tjivikua ta ti momapulaapulo noNampa.
Tjivikua, ina younona omulongo, okwa ti ofamili otai likundu osho i na okuninga po opo i ka yandje ombili nawa keefamili doonakuningwa oihakanwa.
Muundjua okwa mangwa po eshi a hangika ta kendabala okukwata keenghono okakadona (10) e ka kufila ombele momafiku 10 Oktoba.
Mumwainakadona okwa ti omunambili.
“Kandi shi ashike kutya oshinima eshi osha etwa koshike ile osho she mu fininika a ninge ngaha. Eshi ndi shii osheshi kutya ita dulu okuninga ngaha kuye mwene,” osho a ti ngaho.
Okwa lombwela oNampa oshivike sha dja ko kutya, okwe mu talela po keumbo laye oko ta hiila ashike okwa li ta monika “a ngwangwana yee okwa handuka”.
“Okwa li ta monika afa e na eshi a hala okulombwela nge, ashike okwa li a tila. Onda pula ngee oku li ngaa nawa ndele ta ti ahowe. Etitano onde ya keumbo ndele meme ta ti kakwa li ta monika e li nawa, okwa li ta monika a handuka yee okwa lulilwa,” osho a ti ngaho.
Kaume kaMuundjua nomunafikola pamwe naye okwa ti ova shakena tete momudo 2016 eshi va li mondodo yotete.
“Oh, Meme! Okwa li omumati muwa, okwa li kaume ketu, okwa li hatu dana okatanga pamwe notwa kala hatu litalele po luhapu. Ine ya kofikola efimbo lile shaashi okwa li a tulwa pedu. Kandi shii kutya oshike sha ningwa po, ashike okwa lunduluka,” kaume kaye ta ti.
She likolelela kuye, ove mu li xula mOlomakaya.
“Kakwa li ta monika e li nawa efiku olo eshi twe mu mona. Okwa li pwa fa pu na sha sha puka, kakwa li e li ngaashi shito. Okwa li a endelela yee okwa li ta di oupyu. Otwe mu etela onghenda notwe mu halele a kale nawa ongookaume kaye, ashike otwe lineekela kutya ouyuki otau yandjwa,” okamati osho ka lombwela oNampa ngaho.
Muundjua okwa popya kutya oye a ninga oimbuluma ei. Nande eshi a holoka komesho yamangestrata Erasmus Masule Etitatu kakwa li a pulwa ngee oku na ondjo, ashike okwa yandja ombili.
“Onda hala okuyandja ombili molwoinima oyo nda ninga,” osho a lombwela omhangu ngaho, konima eshi aanyenwa obooloha.
Ashike nande ongaho, meme waMassdorp, Jane Laufsie, okwa ti nande paife ofamili oya pepelelwa eshi omutamanekwa a mangwa po, inava itavela kutya ombili yaye oya dja komutima.
“Oya kala odula idjuu kufye. Omutamanekwa ou ota yandje ashike ombili shaashi okwa mangwa. Ngeno okwa li shili a hala okuyandja ombili, ngeno okwe litwala kopolifi nalenale,” osho a ti ngaho.
Komufalandjai wopolifi ta vatele, Anne-Marie Nainda okwa shiivifa koshoongalele shoikundaneki Etitatu ta ti omakonakono opaungoba aa holola kutya Muundjua oye omutamanekwa moshikumungu eshi.
Opolifi oya lopota kutya okwa li a kwatwa kovanambelewa vokwaamena omaliko Olomakaya konima vati kwa li ta kendabala okukwata keenghono okakadona (10) e ka kufila ombele. Eshi osha eta nee opo a kwatakanifwe nomakwatokeenghono nomadipayo ounona vakwao, Maasdorp naFabianu.
-Nampa
The post ‘Okwa li ta monika a ngwangwana’ appeared first on The Namibian.